Калас: Укинувањето на санкциите за рускиот дизел ѝ помага на Москва да ја финансира војната

Шефицата на европската дипломатија, Каја Калас, предупреди дека привременото укинување на санкциите за рускиот дизел ќе ѝ овозможи на Москва да оствари дополнителни приходи за финансирање на војната против Украина. Нејзината реакција следува откако САД и Русија соопштија дека постигнале договор за извоз на руско гориво.

„Суспендирањето на санкциите за рускиот дизел ѝ обезбедува на Москва дополнителни приходи за војување. Сега не е време за ублажување на притисокот врз Русија, а Европа нема да го стори тоа“, напиша Калас на социјалните мрежи.

— реклама —

Американскиот претседател Доналд Трамп вчера изјави дека Русија се согласила да испорачува дизел на светскиот пазар со цел да се намалат цените на горивата. Тој потврди и дека неговата администрација привремено ги укинала американските санкции за руското гориво, кои беа воведени за да се намалат приходите на Москва наменети за финансирање на војната во Украина.

Според соопштението на Кремљ, рускиот претседател Владимир Путин изјавил дека Русија е подготвена да испорачува нафта и нафтени производи во САД и во другите делови на светот, оценувајќи дека тоа би било корисно за светската економија.

— реклама —

Украинскиот претседател Володимир Зеленски синоќа ја осуди одлуката на САД, нарекувајќи ја „срамна“ и „слаба“. Тој предупреди дека со овој потег на Москва ќе ѝ се овозможи да продолжи да ја финансира војната против Украина.

— реклама —

Германија денеска соопшти дека ќе продолжи да ги спроведува санкциите против Русија и покрај одлуката на Трамп. Портпаролот на германската влада, Штефан Корнелиус, изјави дека Берлин ја примил на знаење одлуката на САД што се однесува на испораките на руски дизел.

Тој нагласи дека германскиот став останува непроменет.

„Сојузната влада останува на одлуката за санкциите против Русија и со европските партнери работи на дополнителни санкции“, изјави Корнелиус.

Цените на дизелот, кој се користи во земјоделството, за греење на домаќинствата и во патниот превоз на стоки, се искачија на нивоа блиску до рекордните. Високите цени на горивата претставуваат политички проблем за Трамп и републиканците пред изборите за американскиот Конгрес на 3 ноември, на кои ќе се одлучува дали републиканците ќе го задржат тесното мнозинство.