(Во живо) Калиопи: Татко ми цел живот сонуваше да бидам на оперската сцена, но не дочека да ме види покрај Хозе Карерас

Калиопи во поткастот „Претрес со Ландов“ откри како се чувствувала кога застанала на сцената со легендарниот оперски пејач Хозе Карерас, опишувајќи го моментот како еден од посебните во нејзината музичка кариера.

„Ми беше чест, ми беше голема привилегија да застанам со една таква музичка легенда од тој калибар, со таква музичка историја, со толку многу живот зад себе, и сепак тука покрај нас, на сцена“, раскажа Калиопи.

„Се вратив три чекори зад себе во тој момент, бидејќи сфатив дека мојата маленкост тука е во една минорна функција, додека таа легенда жива го имаше главниот збор“, рече Калиопи.

Таа се присети и на моментот кога Карерас, среде настапот, неочекувано ѝ се обратил.

— реклама —

„Како се чувствувате оваа вечер?“, ја прашал Карерас.

„Феноменално кога сум покрај вас“, му одговорила Калиопи.

Но, зад овој голем професионален момент за неа стои и една лична приказна. Калиопи откри дека единствено за што жалела било тоа што нејзиниот татко не бил жив за да го види нејзиниот настап со Карерас.

Таа раскажа дека татко ѝ цел живот сонувал таа да биде на оперската сцена.

— реклама —

„Не сонуваше дека еден ден ќе застанам покрај еден Хозе Карерас“, рече Калиопи.

„Претрес“ со Калиопи: 50 години под рефлекторите, животот на сцена, Македонија, колегите

Пејачката се присети и на еден од најтешките моменти во нејзиниот живот – денот кога дознала дека ѝ починал татко ѝ, непосредно пред концерт.

Таа требало да настапи на „Фрушка гора“, а утрото, кога на врата ги видела својата менаџерка и придружните вокали, веднаш сфатила дека нешто не е во ред.

— реклама —

„Само ги погледнав и реков: ‘Тато’. И само вака реков: Кој знае. Само ние три, океј. Ќе остане така. Само вие три ќе знаете. Никому да не сте кажале до крајот на концертот. Концерт ќе има, ќе мора да има“, раскажа Калиопи.

И покрај тешката вест, таа излегла на сцена и го одржала концертот.

„Во моментот кога дознав, мислев дека нема да можам да пуштам глас. А нема да ти се верува, тоа беше еден од моите најдобро испеани концерти во цела моја кариера. Мислев: ‘Од каде ми е гласот?’“, раскажа таа.

Во еден момент, како што вели Калиопи, ѝ помислила дека татко ѝ ѝ дава сила.

„Тато, сигурно ми дава сила одозгора“, си рекла таа.

По концертот, пред телевизиска екипа од Нови Сад, Калиопи за првпат кажала што се случило.

„Знаете што, ова беше мојот најтежок концерт во мојата кариера што сум го отпеала. Денеска го загубив татко ми“, им рекла таа.

Калиопи вели дека токму тогаш човек може да сфати колку далеку може да оди неговата сила.