Во тешка сообраќајна несреќа што синоќа се случила на регионалниот пат Куманово–Свети Николе, во пределот Овче Поле, две лица се здобиле со тешки телесни повреди, а уште осуммина биле повредени.
Според информациите од Министерството за внатрешни работи, несреќата била пријавена на 19 јуни околу 20:55 часот во ОВР Свети Николе. Во незгодата учествувале патничко комбе „Фолксваген“ со кумановски регистарски ознаки, управувано од М.Т. (55) од Свети Николе, и паркирано товарно возило „Ман“ со светиниколски регистарски ознаки.
Со тешки телесни повреди се здобиле сопатничките Л.П. (53) и М.М. (33), двете од Свети Николе, додека останатите осум патници се здобиле со телесни повреди. Повредите биле констатирани во Клиничката болница во Штип, каде што повредените биле пренесени по несреќата.
Претходно, од Територијалната противпожарна единица од Свети Николе информираа дека пожарникарите интервенирале во 21:02 часот и учествувале во извлекувањето на повредените лица од возилото, по што тие биле предадени на екипите на Итната медицинска помош.
Увид на местото на несреќата извршила увидна екипа на ОВР Кочани, а се работи на целосно расчистување на околностите под кои се случила сообраќајната незгода.
