Меѓународните превозници од Македонија, Србија, Босна и Херцеговина и Црна Гора најавуваат радикални мерки и можно блокирање на граничните премини, откако, како што тврдат, Европската комисија не понудила решение за проблемот со ограничувањето на престојот на професионалните возачи во Шенген-зоната.
Превозниците за 11 август во Македонија закажаа итен регионален состанок, на кој ќе одлучуваат за натамошните чекори, меѓу кои се и координирани протести и блокади на товарниот сообраќај низ Западен Балкан.
Дополнителен револт предизвикал одговорот од Европската комисија, која предложила разговорите да се одржат онлајн кон крајот на следната недела, наведувајќи дека клучниот персонал, вклучително и надлежните директори од Директоратот за мобилност и транспорт, е на годишен одмор до 12 август.
Проблемот произлегува од строгата примена на правилото „90/180 дена“ за професионалните возачи од земјите надвор од Европската Унија, поради што голем број камионџии не можат да влезат во Шенген-зоната, а транспортните компании предупредуваат дека трпат сериозни финансиски загуби.
Превозниците најавуваат дека, доколку не се постигне договор, би можело да следуваат регионални блокади на клучните гранични премини и прекин на товарниот сообраќај меѓу Европската Унија и Западен Балкан.
