Превозниците од Македонија, Србија, Босна и Херцеговина и Црна Гора утре ќе одржат состанок на кој ќе разговараат за следните чекори поради проблемот со правилото 90 дена престој во период од 180 дена во Шенген-зоната.
Претседателот на Меѓународната транспортна асоцијација на Србија, Неѓо Мандиќ, изјави дека Европската комисија сè уште нема понудено решение со кое професионалните возачи на камиони би биле ослободени од ова ограничување.
Транспортните здруженија од четирите земји веќе испратиле писмо до ЕУ и побарале состанок, а кон крајот на неделата се очекува разговор со претставници на надлежниот директорат на ЕУ за мобилност и транспорт. Според Мандиќ, состанокот најверојатно ќе се одржи онлајн, иако превозниците сметаат дека ваквиот формат не е соодветен за проблем кој директно влијае врз нивната работа.
Дополнителен проблем е што, според Мандиќ, возачи од Западен Балкан и понатаму се депортираат, а камиони се задржуваат и покрај договорот со Европската комисија од 10 април за „нултирање“ на деновите поминати во Шенген-зоната до тој датум и започнување ново броење.
Така, возачите кои веќе го искористиле дозволениот престој од 90 дена во последните шест месеци, според неговите тврдења, сè уште не можат да влезат во Хрватска, Унгарија или Романија.
Превозниците од Србија и Босна и Херцеговина на крајот на јануари годинава четири дена ги блокираа товарните терминали на граничните премини, но ниту тогаш не беше постигнато решение.
По последниот состанок, меѓународните транспортни компании ѝ дадоа рок на Европската комисија до 10 август да се изјасни за начинот на решавање на проблемот, но, според информациите, одговор не добиле.
