Каранфилова Пановска: Македонија е блокирана од лажниот профитерски патриотизам на Мицкоски

Македонија се наоѓа пред сериозни предизвици во европскиот процес, а според заменик-претседателката на СДСМ, Фани Каранфилова Пановска, политиките на актуелната власт ја туркаат државата кон изолација.

Каранфилова Пановска, во интервју за емисијата „Топ тема“ на телевизија Телма, се осврна на изјавите на претседателката на Европската комисија, Урсула фон дер Лајен, дека македонскиот идентитет е загарантиран и не е загрозен со европската интеграција.

— реклама —

Таа оцени дека повторното отворање на преговарачката рамка и создавањето нови билатерални преговори би значело дополнително одолговлекување на европскиот процес. Според неа, преговарачката рамка е усогласена со сите 27 земји членки на Европската Унија и во неа се утврдени прашањата поврзани со македонскиот јазик и идентитет.

„Претседателката на ЕК, Урсула фон дер Лајен, кажа дека нашиот идентитет е бетониран, нешто што ние го зборуваме и го повторуваме со години наназад, и дека со ништо не е загрозен во европската интеграција. Што ќе правиме ние, што ќе прави Муцунски во Софија оваа недела? Дали има намера да репреговара нешто околу преговарачката рамка? А со тоа и околу идентитетот? Нешто што е испреговарано и договорено со 27 држави членки, кое што при тоа го гарантира нашиот идентитет, ако е тоа клучниот проблем, согласно овој лажен патриотизам што го шири ВМРО, нема потреба ние тоа да го реотвораме, најмалку со соседна Бугарија“, рече Каранфилова Пановска.

— реклама —

Таа предупреди дека повторното отворање на веќе договореното би можело да има сериозни последици врз динамиката на пристапувањето кон Европската Унија.

„Ризикот од реотворање на тоа што е веќе дефинирано во преговарачката рамка е огромен. Тоа значи реотворање и репреговарање во сите 27 држави членки. И што значи тоа? Дека ние ќе останеме блокирани вечно? Мислам дека ни е јасно што треба да направиме за да не ги губиме времето и моментот“, додаде таа.

Каранфилова Пановска посочи дека, според пораките од Брисел, преговарачката рамка потврдува дека местото на Македонија е во Европската Унија.

— реклама —

Во продолжение на дебатата, таа ја обвини власта дека со, како што го нарече, „квазипатриотизам“, ја оддалечува Македонија од европскиот пат.

„Државата е на раб на пропаст. Македонија, од предводник во европските интеграции, од држава која што беше прва во реформите, ја доведоа со нивниот квазипатриотизам во фаза да останеме црна дупка на Балканот. Да останеме изолирани од сите, оваа реторика не води никаде“, рече Каранфилова Пановска.

— реклама —

Таа додаде дека ВМРО, според неа, ќе сноси политичка одговорност за блокирањето на европската иднина, како и за, како што наведе, иселувањето на младите, состојбата со Буџетот и Фондот за ПИОМ и задолжувањата.

„Оваа блокирана држава од лажниот профитерски патриотизам служи само на вашата партија. ВМРО ќе одговара и ќе сноси сериозна одговорност за блокирањето на иднината на државата, за иселувањето на младите, за огромната дупка во Буџетот, за огромната дупка во Фондот за ПИОМ, за огромните задолжувања“, рече Каранфилова Пановска.