Ким Џонг-ун доби овластување да командува со нуклеарните сили и ја повика војската да се подготви за војна

Севернокорејскиот лидер Ким Џонг-ун доби дополнителни овластувања со измените на Уставот, меѓу кои и изречно право да командува со нуклеарните сили на земјата. Истовремено, тој ги повика воените команданти да ги засилат подготовките за можен воен конфликт, во услови на затегнати односи со Јужна Кореја.

Северна Кореја неодамна повторно го објави текстот на својот Устав, речиси три години откако го отстрани од официјалната интернет-страница. Станува збор за документ изменет во март годинава, со кој дополнително се зацврстува власта на Ким.

— реклама —

Според новите одредби, Ким, како претседател на Комисијата за државни работи, добива право на вето врз одлуките на парламентот, како и можност да разрешува пратеници што ќе ја изгубат довербата на народот. Уставот сега изречно му дава и овластување да командува со нуклеарните сили, со можност правото за употреба на нуклеарно оружје да го пренесе на надлежно воено тело.

Измените предвидуваат и отстранување на одредбите за обединување на двете Кореи. Јужна Кореја сега е дефинирана како посебна држава, со што Пјонгјанг ја потврдува промената на политиката што Ким ја најави кон крајот на 2023 година.

— реклама —

„Промената на севернокорејскиот Устав го одразува она што го знаеме веќе три години – Северна Кореја не сака да има никаква врска со Јужна Кореја“, изјавил за „Њузвик“ Едвард Хауел, автор на книгата „Новата оска на превирања: Северна Кореја, Русија, Кина, Иран“.

Јужнокорејскиот претседател Ли Џе-мјунг повика на воспоставување траен мир, но Пјонгјанг ги отфрла обидите за приближување меѓу двете земји.

— реклама —

Тензиите дополнително се зголемиле во последните недели поради севернокорејските воени активности. Според извештаите, Пјонгјанг тестирал балистички ракети, а во близина на границата со Јужна Кореја биле забележани и тенкови.

Ким Џонг-ун ги повика воените команданти да ја зголемат борбената подготвеност на единиците и да ја засилат воената обука.

— реклама —

„Главната револуционерна задача на командантите на четите е да ги завршат подготовките на своите единици за да бидат целосно подготвени за војна. Тоа мора да се постигне со значително подобрување на интензивната воена обука“, порача Ким.

Тој додаде дека неговата крајна цел е изградба на што е можно посилна војска и забрзување на нејзината модернизација. Со уставните измени дополнително е зајакната и неговата контрола врз вооружените сили, вклучително и врз нуклеарниот арсенал.