Севернокорејскиот лидер Ким Џонг Ун беше реизбран за генерален секретар на владејачката Работничка партија на четвртиот ден од партискиот конгрес, соопшти државната новинска агенција КЦНА. Одлуката беше донесена едногласно од делегатите, во потег што ја зајакнува политичката доминација на режимот, пренесува Ројтерс.
КЦНА соопшти дека реизборот на Ким Џонг Ун е „во согласност со непоколебливата волја и едногласната желба на сите делегати“ кои присуствуваа на конгресот.
Конгресот на Работничката партија се свикува на секои пет години и е клучен политички настан за земјата. Традиционално, тој служи како механизам за потврдување на лидерството и стратешката насока на режимот, а може да биде придружен со најави за промени во политиката или преместувања на високи позиции.
Од претходната конференција во 2021 година, Северна Кореја продолжи да го развива својот нуклеарен арсенал и спроведе повеќекратни тестови на интерконтинентални балистички ракети (ICBM), пркосејќи на забраните на Советот за безбедност на ООН.
Земјата е под меѓународни санкции поради своите нуклеарни и балистички ракетни програми, а притисоците значително влијаат на нејзината економија.
Севернокорејската економија се соочува со сериозни проблеми, додека недостигот од храна останува хроничен. И покрај тешкотиите, раководството инсистира на продолжување на воената и нуклеарната стратегија на земјата.
Реизборот на Ким Џонг-ун го потврдува одржувањето на постојната политичка линија, во време кога Пјонгјанг останува меѓународно изолиран.
