Севернокорејскиот лидер Ким Џонг Ун присуствуваше на свеченото отворање хотели во туристичка зона, во придружба на својата ќерка Џу Е, и го пофали економскиот напредок на земјата во пресрет на клучниот партиски конгрес што треба да се одржи на почетокот на 2026 година.
Пет хотели беа отворени во саботата и неделата во севернокорејската туристичка зона Самјијон, во североисточниот дел на Корејскиот Полуостров, во близина на границата со Кина, објави во вторникот државната новинска агенција КЦНА.
Фаворитка за идна лидерка на Северна Кореја
Ким во саботата ги обиколил луксузните хотели заедно со Џу Е, според фотографиите објавени од државните медиуми. Според некои аналитичари, Џу Е се смета за фаворитка за наследничка на својот татко на чело на Северна Кореја.
Ким изјавил дека хотелите се „јасен доказ за растечкиот статус на нашиот народ и за развојниот потенцијал на нашата земја“, пренесува КЦНА. Севернокорејскиот лидер во изминатиот месец присуствувал на повеќе свечени отворања на производствени погони. Само минатата недела бил на отворањето на три регионални фабрики.
Се очекува Северна Кореја на почетокот на 2026 година да го одржи својот прв партиски конгрес по пет години, на кој треба да биде претставен нов развоен план за следните пет години. Државните медиуми, меѓу кои и „Родонг Синмун“, повикуваат на сеопфатен ангажман на јавноста за завршување на големите проекти пред одржувањето на конгресот.
