Кина го поздрави потпишувањето на меморандумот за разбирање меѓу САД и Иран, со кој се предвидува итен прекин на непријателствата, оценувајќи дека договорот претставува важен чекор кон намалување на тензиите на Блискиот Исток.
Портпаролот на кинеското Министерство за надворешни работи, Лин Џијан, изјави дека потпишувањето на документот има позитивно значење за смирување на ситуацијата и зацврстување на напорите за прекин на огнот.
„Кина го поздравува овој развој на настаните и се надева дека сите вклучени страни, вклучително и САД и Иран, ќе го почитуваат духот на договорот и совесно ќе ги исполнуваат своите обврски“, изјави Лин на редовната прес-конференција во Пекинг.
Тој додаде дека Пекинг очекува Вашингтон и Техеран во следната фаза од разговорите да пристапат рационално и прагматично, подготвени за заемни отстапки со цел да се постигне трајно решение.
Кинескиот дипломат потсети и на напорите на Пекинг за дипломатско решавање на кризата, како и на поддршката за посредничката улога на Пакистан во постигнувањето на договорот.
„Кина ќе продолжи да игра активна и конструктивна улога во обезбедувањето траен мир и стабилност на Блискиот Исток и во регионот на Заливот“, рече Лин.
Осврнувајќи се на актуелните случувања во регионот, тој нагласи дека сите релевантни страни, вклучително и Израел, треба да дејствуваат во интерес на мирот и стабилноста и да дадат предност на дипломатијата.
Рамковниот договор меѓу САД и Иран стапи во сила веднаш по потпишувањето, соопшти пакистанскиот премиер Шехбаз Шариф, чија земја посредуваше во процесот. Според него, Иран веднаш ќе го отвори Ормутскиот Теснец, додека САД ќе ја укинат поморската блокада на иранските пристаништа.
Претходно, иранското Министерство за надворешни работи и американски претставници потврдија дека документот го потпишале американскиот претседател Доналд Трамп и иранскиот претседател Масуд Пезешкијан.
Според американски медиуми, предвременото потпишување на договорот имало за цел побрзо повторно отворање на Ормутскиот Теснец, една од најважните светски поморски рути за транспорт на енергенси.
Сепак, Трамп нагласи дека договорот останува условен и предупреди дека САД би можеле повторно да преземат воени мерки доколку Иран не ги исполни преземените обврски.
