Кина и ЕУ преговараат за новите ограничувања за увоз на челик

Кина преговара со Европска Унија во рамки на Светска трговска организација поради новите ограничувања на ЕУ за бесцаринскиот увоз на челик, изјави денеска портпаролот на кинеското Министерство за трговија, Хе Јадонг.

— реклама —

Тој оцени дека новите мерки на Европската Унија ќе влијаат врз билатералната трговија со челик и врз стабилноста на глобалните синџири на снабдување, пренесе Reuters.

— реклама —

„Кина се надева дека преку преговори ќе биде постигнато заемно корисно решение“, изјави Хе.

Европската Унија воведе нови ограничувања за бесцаринскиот увоз на челик како дел од мерките за заштита на домашната индустрија, поради зголемениот притисок од поевтиниот увоз и намалената побарувачка на европскиот пазар.

— реклама —

ЕУ уште во 2018 година воведе заштитни мерки за увоз на челик, откако САД, за време на администрацијата на претседателот Доналд Трамп, воведоа царини за челик и алуминиум, што доведе до пренасочување на вишоците челик кон европскиот пазар, наведува Европска комисија.

Кина со години е меѓу најголемите светски производители и извозници на челик, а трговските тензии меѓу Пекинг и Брисел дополнително се засилија во последните години поради прашањата за индустриски субвенции и трговски бариери.