Кина извлече нафта од длабочина од 8.080 метри под пустината

Најголемото кинеско пустинско нафтено поле Фуман, сместено на работ на пустината Такламакан во автономниот регион Синџијанг, произвело повеќе од 26 милиони тони нафта и гас од наоѓалишта подлабоки од 6.000 метри.

Во истражната бушотина Џентан-1, на работ на пустината Такламакан, инженерите од длабочина од 8.080 метри извлекле примероци од карпи стари околу 500 милиони години, пишува „Глобал тајмс“.

— реклама —

Кина така за првпат во историјата во северозападниот дел на Таримскиот басен извлекла примерок од карпа од длабочина поголема од 8.000 метри, наведува весникот.

Пустината Такламакан се наоѓа во централниот дел на басенот на југот на Синџијанг и зазема најголем дел од тој огромен континентален басен.

— реклама —

„Примероците ќе ни овозможат да го процениме потенцијалот за создавање јаглеводороди на длабочини поголеми од 8.000 метри“, изјавил директорот на проектот при CNPC, Сју Јанан, според извештајот на кинеската државна телевизија CCTV.

— реклама —

„Досега од длабоките наоѓалишта под пустината Такламакан произведовме 20,36 милиони тони нафта и 8,15 милијарди кубни метри гас“, изјавил инженерот Лу Џонгјуан, според извештајот на CCTV.

Производството од длабоките наоѓалишта под пустината Такламакан е зголемено во последните години. Во нафтеното поле Фуман досега се избушени 485 бушотини, од кои 133 произвеле повеќе од 100.000 тони, а 464 повеќе од 10.000 тони нафта и гас, наведува „Глобал тајмс“.

Со тоа, Таримското нафтено поле станало најголемото кинеско нафтено поле во пустината и најголемата база за производство на јаглеводороди од исклучително длабоки наоѓалишта, наведуваат кинеските медиуми.

Длабоките наоѓалишта во басенот се сметаат за важен потенцијал за зголемување на кинеските резерви и производството на нафта и гас. Досега во басенот се потврдени повеќе од пет милијарди тони резерви, а повеќе од половина се наоѓаат на длабочини поголеми од 6.000 метри.