Кина воведе построги ограничувања за патувања во странство

Кинеските власти од денеска ги заоструваат правилата за излез од земјата, со нови ограничувања за лица кои ги прекршиле прописите за контрола на извозот или трансфер на технологии и со тоа можат да ја загрозат националната индустриска и технолошка безбедност, објави ДПА.

— реклама —

Според новата регулатива, за ваквите случаи не е утврден максимален рок на забраната за напуштање на Кина. За кинески граѓани за кои ќе се утврди дека за време на престојот во странство ѝ нанеле штета на националната безбедност или на интересите на земјата, забраната за патување може да трае од шест месеци до три години.

Пекинг ги оправдува мерките со потребата од заштита на технолошкото знаење и спречување прекугранични измами, незаконско коцкање и корупција. Кинеските власти посочуваат и случаи во кои граѓани ја напуштиле земјата без дозвола и незаконски пренеле технологии во странство.

— реклама —

Иако можноста за ограничување на излезот од земјата поради национална безбедност постоеше и претходно, критичарите сметаат дека новите правила претставуваат дополнително проширување на државната контрола врз слободата на движење.

— реклама —

Регулативата содржи 19 одредби и првично беше објавена во јули. Со неа се прошируваат и барањата за претходно одобрение за патување во странство за одредени категории службеници.

Досега партиските и државните службеници беа обврзани да ги предаваат личните пасоши во матичните институции и да добиваат дозвола за патување, особено поради заштита на државните тајни. Со новите правила, дел од овие обврски се прошируваат и на вработени во училиштата и други јавни институции.

— реклама —

Новата регулатива го уредува и влезот во Кина. На странци кои дале неточни информации при барањето за виза или при влез во земјата може да им биде изречена забрана за влез во траење од една до пет години.