Администрацијата на американскиот претседател Доналд Трамп ги објави плановите за изградба на голем споменик во Вашингтон, проект со кој, како што наведува, сака да остави траен белег во главниот град на САД.
„Воодушевен сум што можам да објавам дека мојата администрација денес официјално ги достави презентацијата и плановите до Националната комисија за ликовни уметности за она што ќе биде најдобриот и најубавиот споменик во светот“, изјави Доналд Трамп.
Според најавите, споменикот ќе биде висок 76 метри и се очекува да стане најголем објект од ваков тип во светот.
„Ќе биде прекрасен додаток за Вашингтон, во кој сите Американци ќе можат да уживаат со децении“, изјави Доналд Трамп.
Планот предвидува на објектот да бидат поставени три златни статуи, како и натписи со златни букви „Една нација под Бог“ и „Слобода и правда за сите“.
Проектот е инспириран од Триумфалната капија во Париз и е дел од серијата иницијативи на Трамп насочени кон редефинирање на изгледот на американската престолнина.
Покрај овој проект, претходно беше изградена и голема сала за свечености во Белата куќа, а беше донесена и одлука за преименување на Кенеди центарот, како и за изработка на златна монета со ликот на актуелниот претседател.
