„Ќе одговориме“: Путин реагираше на предупредувањето на Зеленски дека руското небо станува опасно

Украинскиот претседател Володимир Зеленски предупреди дека воздушниот простор над Русија постепено станува небезбеден за цивилниот воздушен сообраќај, додека Москва неговата порака ја протолкува како закана. Рускиот претседател Владимир Путин порача дека, доколку дојде до трагедии, Русија ќе одговори.

„Денес сакаме да ја предупредиме секоја авиокомпанија што го користи рускиот воздушен простор, секој што сè уште ги користи клучните руски аеродроми: руското небо станува целосно опасно“, изјави Зеленски, според украинските медиуми.

— реклама —

Тој додаде дека руските власти, според него, не го прикажуваат вистинското ниво на опасност, но дека во услови на војната што ја започнала Русија, воздушниот простор над земјата постепено ќе станува недостапен.

„Војната што ја започна Русија го затвора нивното небо“, порача Зеленски, додавајќи дека предупредувањето е упатено не само до цивилното население, туку и до другите држави и авиокомпании.

— реклама —

Изјавата предизвика реакција од Кремљ. Путин рече дека доколку ваквите пораки навистина биле упатени, тие можат да се сфатат како најава за „државен тероризам“.

„Ако е изговорено наглас, тоа едноставно е обвинение за државен тероризам“, изјави Путин. Тој додаде дека Украина истовремено повикува на продолжување на преговорите и средби, но дека, според него, „со терористи не се преговара“.

— реклама —

Рускиот претседател предупреди и дека Москва ќе најде начин да одговори доколку, како што рече, дојде до трагедии.

„Ако, не дај Боже, се случат такви трагедии, ќе најдеме како да одговориме. Нека никој не се сомнева во тоа“, порача Путин.

По изјавите на Зеленски, Украина официјално ја информирала Меѓународната организација за цивилно воздухопловство (ICAO) дека, според нејзината проценка, рускиот воздушен простор не е безбеден за цивилниот воздушен сообраќај и повикала на избегнување летови над територијата на Русија.

Украинскиот министер за надворешни работи Андриј Сибиха за ова информираше преку социјалната мрежа „Икс“ во средата, 2 септември.