„Ќе разговарам и во иднина“ – Мицкоски ја брани комуникацијата со обвинителот Савески

Премиерот Христијан Мицкоски изјави дека не гледа ништо спорно во тоа што телефонски разговарал со републичкиот јавен обвинител Ненад Савески, откако во јавноста се отворија прашања за можен притисок врз обвинителството.

— реклама —

Говорејќи за случајот со злоупотребите со мазут, кој беше затворен поради недостиг на докази, Мицкоски нагласи дека постои разлика меѓу судската и обвинителската власт.

— реклама —

„Не знам што е чудно што сум се слушнал со јавниот обвинител. Друго се судиите, судската власт е сосема самостојна. Но, јавниот обвинител го предлагаме ние како Влада, а го избира Парламентот. Логично е да барам отчет од него“, изјави премиерот.

— реклама —

Тој откри дека од Савески побарал информации за текот на повеќе предмети, при што бил информиран дека околу 80 проценти од претходно нераспределените случаи веќе се дадени во работа, што значи дека се отвораат нови предистраги и истраги.

— реклама —

„Не гледам зошто од тоа се направи врева. Ќе разговарам и во иднина, тоа ми е работа – да го прашувам што е, како е и докаде е“, рече Мицкоски, додавајќи дека е нормално да се интересира за процесите во институцијата, имајќи предвид дека Владата го предлага, а Собранието го избира јавниот обвинител.