Ќе се поставуваат камери на над 200 локации во Скопје: На мета дивите депонии и вандалите

Повеќе од 200 локации низ Скопје ќе бидат покриени со надзорни камери со цел да се спречи создавањето диви депонии и уништувањето на јавната урбана опрема. Градот ја очекува конечната согласност од Агенцијата за заштита на личните податоци, по што ќе започне поставувањето на камерите.

Градоначалникот Орце Ѓорѓиевски најави дека надзорот ќе ги опфати критичните места на кои често се создаваат диви депонии, како и парковите каде што се забележува вандализам.

— реклама —

Како пример ја посочи фонтаната „Лотос“ во Градскиот парк, која неодамна беше обновена, но клупите околу неа повторно биле ишарани со графити.

„Ја обновивме по толку години, прекрасно изгледа и тоа е еден од препознатливите белези на градот Скопје. Откако ја обновивме, трипати досега со графити ги исцртуваат клупите што постојано ги бојадисуваме преку нашето јавно претпријатие“, рече Ѓорѓиевски.

— реклама —

Тој нагласи дека, покрај надзорот и спречувањето на ваквите појави, потребно е и подигнување на свеста кај граѓаните за зачувување на јавниот простор.

„Град Скопје не е на Орце, ниту на некоја политичка партија. Градот е на сите скопјани и, како што си го чуваме својот дом, така треба да си го чуваме и градот“, порача градоначалникот.

Според Ѓорѓиевски, парите што се трошат за поправка на оштетената урбана опрема и отстранување на последиците од несовесното однесување би можеле да се вложат во нови проекти и уредување зелени површини.

— реклама —

Тој информираше дека во завршна фаза е изградбата на парк во Бутел, на површина од 86.000 квадратни метри, на место каде што претходно имало дива депонија. Планиран е и парк во Карпош, со површина поголема од 70.000 квадратни метри.

Дополнително, во општина Аеродром треба да се уреди простор од речиси 100.000 квадратни метри, кој, според најавите, треба да биде ставен во функција до крајот на наредната година.

Осврнувајќи се на депонијата „Вардариште“, Ѓорѓиевски рече дека таа зафаќа површина поголема од 600.000 квадратни метри. Една фаза од работите е завршена, а во следниот период треба да следува деконтаминација на земјиштето со поддршка од Владата.

Градоначалникот очекува напролет да започне постапката за уредување на просторот, каде што е планирано да се изгради нов голем парк.