Министерката за образование и наука, Весна Јаневска, најави разговор со родителите на 13-те ученици од Долни Балван, откако тие реагираа на најавата нивните деца од септември да ја следат наставата во соседното село Таринци.
Јаневска посочи дека Министерството е запознаено со реакциите, но нагласи дека оптимизацијата на училиштата е во надлежност на општините, додека ресорното министерство дава насоки за тоа што е најдобро за учениците.
Според неа, суштината не е само во затворањето или оптимизацијата на подрачното училиште, туку во условите во кои децата учат и во можностите за нивен развој и социјализација.
Таа смета дека учениците не треба да бидат изолирани во средини каде што наставата се одвива во комбинирани паралелки со мал број ученици, особено кога во близина има друго училиште. Јаневска посочи дека училиштето во Таринци е оддалечено околу два километри и, според неа, таму децата би имале подобри услови за учење и поголеми можности за социјализација.
„Во прашање се децата и добробитта на децата“, нагласи министерката, додавајќи дека нејзината цел е учениците да имаат можност да стекнуваат нови искуства, да се дружат со поголем број врсници и да учат во современи услови.
Јаневска оцени и дека стравувањата на родителите дека со затворањето на училиштето ќе згасне и локалната заедница не се оправдани, имајќи предвид дека Таринци се наоѓа на само два до два и пол километри од Долни Балван.
Таа нагласи дека промените нема да се спроведуваат насилно и дека ќе се бара заедничко решение со општината, училиштето и родителите.
Родителите, пак, се загрижени поради преместувањето на нивните деца во Таринци, особено околу организацијата и безбедноста на превозот до училиштето.
Градоначалникот на Карбинци, Виктор Паунов, претходно појасни дека на седницата на Советот не било донесено решение за затворање на училиштето. Тој, сепак, посочи дека условите во објектот во Долни Балван се несоодветни и дека во соседното населено место има ново училиште на помалку од два километри.
Паунов објасни и дека законски, во комбинирана паралелка може да има најмногу 10 ученици. Во Долни Балван има 13 ученици, поради што, според него, не може да се формира комбинирана паралелка, за разлика од Крупиште, каде што девет ученици продолжуваат да следат настава.
