„Клековски и Мицкоски не менаџираат со кризата - се зголеми бројот на заболени од западнонилска треска: 56 случаи, 7 починати“, велат од СДСМ

СДСМ преку соопштение ја обвини Владата предводена од Христијан Мицкоски и министерот за здравство Сашо Клековски за несоодветно справување со состојбата со западнонилската треска во Македонија.

Од партијата велат дека до 1 септември се регистрирани 56 случаи на западнонилска треска, при што, според нивните наводи, има и седум починати.

— реклама —

СДСМ тврди дека Македонија е на прво место во Европа според бројот на заболени во однос на бројот на жители, посочувајќи ги како споредба Италија, Грција и Романија.

„Повторно, исто како и здравствената криза со труењето во Гостивар, здравствените институции на Мицкоски закаснија со реакцијата“, наведуваат од СДСМ.

— реклама —

Од опозициската партија оценуваат дека Владата нема доволен капацитет за навремена превенција и заштита на здравјето на граѓаните, туку реагира откако состојбата ќе ескалира.

— реклама —

СДСМ упатува критики и за мерките против комарците, обвинувајќи дека не биле спроведени навреме и дека со реакцијата задоцнил и градоначалникот на Општина Центар, Орце Ѓорѓиевски.

„Не функционира системот за превенција, заштита и контрола на вектор-преносливи болести. Не функционираат градоначалниците на ВМРО-ОКГ. Не функционираат здравствените институции“, стои во партиското соопштение.

— реклама —

Од СДСМ додаваат дека државата, според нив, не ја менаџира епидемијата, туку само реагира на нејзините последици.

„Цената ја плаќаат граѓаните, со своето здравје“, порачаа од СДСМ.