Засилени мерки за контрола на комарците и информирање на населението се спроведуваат во подрачјата каде што е регистриран зголемен број случаи на западнонилска треска, информираше денеска министерот за здравство Сашо Клековски.
Според последните податоци на Институтот за јавно здравје, заклучно со 18 август во Македонија се регистрирани 38 случаи на западнонилска треска, од кои 36 се потврдени, а два се веројатни. Дури 37 случаи се регистрирани во Скопскиот регион. Досега има и четири смртни случаи кај лица со невроинвазивна форма на болеста, а во периодот од 12 до 18 август се пријавени 12 нови случаи.
На 11 август, ЦЈЗ Скопје пријави епидемија на западнонилска треска во Кисела Вода, Гази Баба, Аеродром и Бутел.
Клековски информираше дека продолжуваат систематските и вонредните активности за ларвицидна и адултицидна дезинсекција, со авионско и терестичко прскање во Скопје и општините Гази Баба, Кисела Вода, Арачиново, Зелениково, Илинден, Петровец, Сопиште, Чучер Сандево и Велес. До 14 август биле реализирани повеќе циклуси на третман, вклучително и дополнителни интервенции на застоени водени површини.
Паралелно се спроведува и СМС-кампања за информирање на граѓаните за заштита од комарци. Планирано е да бидат испратени околу 38.500 пораки. Вчера биле испратени 6.526 пораки до граѓаните во Петровец и Гази Баба, а во наредниот период ќе бидат испратени уште 31.365.
Од Министерството потсетуваат дека граѓаните треба да отстрануваат застоена вода од дворовите, редовно да ги чистат олуците, да користат заштитни мрежи и репеленти и да избегнуваат престој на отворено во зори и самрак. При појава на висока температура, главоболка, вкочанетост на вратот или други симптоми, се препорачува веднаш да се побара лекарска помош.
