Повеќе од 8.300 повици биле примени на Единствениот број за итни случаи 112 во периодот од 17:00 до 21:00 часот, откако силно невреме го зафати Скопје, соопшти Центарот за управување со кризи (ЦУК).
Од ЦУК информираат дека операторите работеле со полн капацитет, а уште во првиот час биле ангажирани и дополнителни смени за да се одговори на огромниот број повици.
„Операторите на 112 работат во полн капацитет, а уште во првиот час беа ангажирани и дополнителни смени со цел да се одговори на зголемениот број повици. И во моментов сè уште има зголемен интензитет на повици од граѓаните, а сите примени пријави континуирано се процесуираат и се проследуваат до надлежните институции и служби“, соопштија од ЦУК.
Оттаму апелираат до граѓаните за трпение и разбирање поради големиот број повици, посочувајќи дека доколку не успеат веднаш да воспостават контакт со бројот 112, пријавите за материјална штета можат да ги достават и во текот на утрешниот ден.
„Доколку не успеат веднаш да воспостават контакт со 112, пријавите за материјални штети можат да ги пријавуваат и во текот на утрешниот ден, по што истите ќе бидат навремено евидентирани и проследени до надлежните служби“, наведуваат од ЦУК.
