Спасувачките екипи во Колумбија водат трка со времето за да пронајдат преживеани кои останале заробени под урнатините, два дена по силниот земјотрес во кој, според досегашните податоци, загинале најмалку 250 лица.
Градоначалникот на Кали, Алехандро Едер, предупреди дека останува помалку од еден ден до истекот на 72-часовниот период по земјотресот, кога шансите за пронаоѓање преживеани се значително поголеми.
„Ќе продолжиме да работиме и по тој рок, но важно е денес да спасиме што е можно повеќе луѓе“, порача Едер, повикувајќи на мир и ред околу местата каде што спасувачите пребаруваат.
Земјотресот со магнитуда од 7,4 степени ја погоди земјата во понеделникот наутро. Според официјалните проценки, повредени се околу 3.770 лица, уништени се повеќе од 9.550 домови, а погодени се над 30.300 семејства.
Во Кали, третиот по големина град во земјата, се урнале повеќе од 56 објекти. Таму загинале најмалку 95 лица, а речиси 1.000 се повредени. Во Переира, во срцето на познатиот регион за производство на кафе, загинале најмалку 79 лица, додека околу 300 се водат како исчезнати.
Спасувачите се фокусирани на повеќе објекти во Кали каде што постои можност да има преживеани. Во комплексот „Torres del Limonar“, жители, војници и спасувачи формирале синџири за отстранување на урнатините.
Според спасувачите, подобрата организација на акцијата и ограничувањето на пристапот на волонтери овозможиле намалување на бучавата и вибрациите, што им помогнало на специјалните сензори полесно да регистрираат движења под урнатините. Од еден станбен блок во првите 12 часа биле спасени повеќе од 20 лица, а подоцна живи биле извлечени уште тројца луѓе и едно куче.
Во земјата пристигнува и меѓународна помош. Колумбиските власти координираат пристигнување на помош од Перу, Мексико и Ел Салвадор, додека мексикански тим за пребарување и спасување веќе е ангажиран на терен.
Земјотресот предизвика и сериозни материјални последици во регионот познат по производството на кафе, од кој зависат стотици илјади семејства. Дел од пристаништата привремено го прекинаа работењето поради проценките на последиците од одроните и оштетувањата на патиштата.
Во меѓувреме, семејствата на исчезнатите со часови чекаат вести за своите најблиски. Меѓу нив е и Марсела Перез, која чека да биде спасена 11-годишната ќерка на нејзиниот партнер, заробена под урнатините заедно со бабата и дедото.
„Тука сме од понеделник и чекаме да го спасат девојчето, како и нејзините баба и дедо. Само чекаме и се надеваме“, изјавила таа.
