Бројот на загинати во силниот земјотрес што ја погоди Колумбија во почетокот на неделата достигна 281, додека спасувачките екипи и натаму трагаат по стотици лица кои се водат како исчезнати.
Според колумбиските власти, во земјотресот со јачина од 7,4 степени биле повредени 3.971 лица, додека 379 луѓе сè уште се водат како исчезнати, објави ЕФЕ.
Земјотресот во понеделникот го погоди западниот дел на земјата и предизвика големи разурнувања во повеќе градови. Оштетени се голем број домови, училишта, болници и друга критична инфраструктура.
Епицентарот бил регистриран во близина на Сан Хозе дел Палмар, во департманот Чоко, а силните потреси биле почувствувани и во други делови на Колумбија, меѓу кои и главниот град Богота, како и во соседните земји.
Спасувачките служби продолжуваат со пребарување на урнатините во обид да пронајдат преживеани. Властите предупредуваат дека времето за спасување на луѓето кои можеби се заробени под урнатините е сè пократко.
Помош за погодените најави и Европската Унија, која ќе издвојува два милиони евра за поддршка на Колумбија во справувањето со последиците од катастрофата.
„Додека операциите за пребарување и спасување се во тек, ЕУ ја поддржува Колумбија со сите расположливи ресурси“, изјави претседателката на Европската комисија, Урсула фон дер Лајен.
