Управата за јавни приходи соопшти дека по обработката на даночните биланси за 2025 година е евидентиран раст на даночната основа, пресметаниот данок и нето-даночниот ефект кај данокот на добивка, што укажува на подобри финансиски резултати кај компаниите и стабилна наплата на јавните приходи.
Според податоците, даночен биланс за оданочување на добивка поднеле 25.506 компании, што е повеќе во однос на претходната година, додека над 50.000 компании поднеле даночен биланс за оданочување на вкупен приход.
Кај компаниите што плаќаат данок на добивка, даночната основа и пресметаниот данок бележат раст од 14 проценти во споредба со 2024 година. По пресметките, за доплата остануваат над 5,8 милијарди денари, додека нето-даночниот ефект е зголемен за 33 проценти.
Од УЈП посочуваат дека ваквите резултати се должат пред сè на повисоките добивки кај компаниите и на помалиот износ на користени даночни олеснувања.
Во поедноставениот даночен режим, кој најчесто го користат микро и малите компании, данок на вкупен приход пресметале 3.883 даночни обврзници, што е раст од 8,6 проценти во однос на претходната година.
Кај трговците-поединци, занаетчиите, земјоделците и лицата што вршат самостојна дејност, даночната основа и пресметаниот данок се зголемени за два до три проценти во споредба со 2024 година.
УЈП информира дека по обработката на даночните биланси ќе продолжи со активности за откривање неподнесени пријави, наплата на долговите и контрола на даночната усогласеност.
