„Компанија основана во јули 2024 година добила над 3,4 милиони евра од Општина Чаир“, велат од ДУИ

Демократската унија за интеграција (ДУИ) преку соопштение побара итна институционална истрага поради, како што наведува, сериозни сомнежи за корупција во Општина Чаир, откако до партијата пристигнале документи кои, според нив, отвораат прашања за начинот на трошење на јавните средства.

Од ДУИ во соопштението тврдат дека компанијата „НУМ КОНСТРАКШН ЛТД ДООЕЛ“, основана на 10 јули 2024 година, за краток временски период добила четири договори од Општина Чаир во вкупна вредност од 212.954.005 денари, односно 3.462.665 евра.

— реклама —

Според партијата, станува збор за договори во вредност од околу 1,44 милиони евра, 973 илјади евра, 994 илјади евра и над 57 илјади евра.

„Особено загрижувачки е фактот што компанијата е основана само неколку месеци пред да почне да добива милионски договори од Општина Чаир“, наведуваат од ДУИ.

— реклама —

Оттаму посочуваат дека два од договорите биле потпишани во периодот кога градоначалник бил Висар Ганиу, а останатите два во време кога, според нив, политичките структури на Изет Меџити ја контролираат општината.

— реклама —

Во соопштението ДУИ наведува и дека седиштето на компанијата е регистрирано на приватна адреса во Чаир, каде што, според достапната документација, биле регистрирани и други деловни субјекти поврзани со лица од истото семејство. Од партијата потенцираат дека тоа само по себе не претставува доказ за незаконитост, но, според нив, е доволна причина за детална институционална проверка.

„Граѓаните имаат право да знаат како компанија основана во 2024 година добила над 3,4 милиони евра јавни средства, кои биле нејзините капацитети и референци, кој ја проверил исполнетоста на условите и дали биле испитани евентуални деловни, семејни и политички врски“, наведуваат од ДУИ.

Партијата бара Државната комисија за спречување на корупцијата, Државниот завод за ревизија и Јавното обвинителство веднаш да ги испитаат сите околности поврзани со овие договори и јавно да ги објават своите наоди.

Воедно, ДУИ во соопштението најави дека ќе ги информира Делегацијата на Европската Унија, Европската комисија, европратениците и меѓународните партнери за, како што велат, институционалното непостапување во случаи на сериозни сомнежи за корупција.