Американската економија се соочи со значителен финансиски удар како последица на воениот конфликт со Иран, а најголемиот дел од трошоците, според анализите, на крајот паднал врз товарот на граѓаните. Зголемените цени на горивата и повторниот раст на инфлацијата директно се одразиле врз животниот стандард на милиони Американци.
Според прелиминарната анализа на американскиот Центар за стратешки и меѓународни студии (CSIS), трошоците на американското Министерство за одбрана достигнале околу 40 милијарди долари.
Во оваа сума се вклучени расходите за муниција, уништена воена опрема и штетите на американските воени бази. Проценката, сепак, не ги опфаќа редовните оперативни трошоци, кои веќе биле предвидени во одбранбениот буџет за фискалната 2026 година, кој надминува еден билион долари.
Покрај Пентагон, дополнителни финансиски обврски имале и други американски институции. Се проценува дека Министерството за внатрешна безбедност и Министерството за ветерани заедно потрошиле уште околу една милијарда долари поради последиците од конфликтот.
Последиците од војната најдиректно ги почувствувале американските потрошувачи.
Во текот на конфликтот, просечната цена на галон бензин пораснала од помалку од три на повеќе од четири долари. Според податоците на Универзитетот Браун, просечно американско домаќинство потрошило околу 253 долари повеќе отколку што би потрошило доколку не се случел конфликтот.
Дополнително, снабдувањето со нафта од Блискиот Исток било сериозно нарушено речиси четири месеци. Аналитичарите проценуваат дека светскиот пазар во тој период останал без околу 1,15 милијарди барели нафта.
Растот на цените на енергенсите дополнително ја поттикнал инфлацијата во САД. Најновите економски податоци покажуваат дека годишната инфлација надминала четири проценти, што е највисоко ниво во последните три години.
Поради тоа, платите не успеале да го следат растот на трошоците за живот. Економистите предупредуваат дека во април и мај инфлацијата практично го избришала ефектот од зголемувањата на платите, па куповната моќ на многу Американци останала непроменета или дури се намалила.
Експертите предупредуваат дека економските ефекти од војната нема да исчезнат веднаш. Доколку цените на енергенсите останат високи и во наредните месеци, дополнителниот притисок врз инфлацијата и врз животниот стандард на граѓаните би можел да продолжи и по завршувањето на конфликтот.
Иако борбите се зад нив, финансиската сметка од војната сè уште пристигнува – и тоа најмногу кај американските семејства.
