Користел стар ценовник и продавал по пониски цени: Кривична за ексдиректор на „Национални шуми“

Надворешната канцеларија за криминалистички работи Делчево поднесе кривична пријава до Основното јавно обвинителство Делчево против 52-годишниот Валентин Груевски од Битола, поради сомнение за сторено кривично дело „злоупотреба на службената положба и овластување“.

— реклама —

Според информациите од Министерството за внатрешни работи, пријавениот, во својство на поранешен директор на Јавното претпријатие „Национални шуми“, во периодот од 13 февруари 2023 до 7 мај 2024 година склучил и потпишал осум договори за купопродажба на опожарена дрвна маса со шест правни лица.

— реклама —

Во договорите, како што наведува МВР, бил користен ценовник од 5 декември 2014 година, кој во тој момент бил неважечки и содржел пониски цени од важечкиот ценовник донесен на 21 јули 2022 година.

— реклама —

Сите осум договори биле реализирани, при што, според полицијата, на шесте правни лица им била овозможена имотна корист во износ од 2.053.838 денари. За истиот износ, како што се наведува во пријавата, била предизвикана штета на ЈП „Национални шуми“.

— реклама —

Од МВР информираат дека случајот е доставен до надлежното обвинителство, кое ќе постапува понатаму по кривичната пријава.