Косово бара струја од Србија

Во услови на енергетска криза, Приштина од Европската Унија бара да изврши притисок врз Белград за да овозможи пренос на електрична енергија од Србија кон Косово, со цел да се обезбеди поевтин увоз.

Енергетската заедница, со седиште во Виена, која го следи усогласувањето на енергетските политики во Западен Балкан и регионот на Црното Море, уште претходно постави рок до 1 јули Србија да обезбеди прекуграничен преносен капацитет кон Косово. Барањето произлезе од одлука на Министерскиот совет на организацијата, со која Белград беше повикан да постапува во согласност со правилата на Енергетската заедница.

— реклама —

Србија досега не го исполнила ова барање, што дополнително ги продлабочува несогласувањата меѓу Белград и Приштина.

— реклама —

Во исто време, српскиот претседател Александар Вучиќ ја зголеми загриженоста со изјавата дека се разгледува можноста за промена на текот на реката Ибар. Тој откри дека биле ангажирани експерти, инженери и претставници од градежниот сектор, кои ја анализираат оваа можност.

„Веќе повикавме експерти кои се занимаваат со тоа, градежниот сектор, инженери и други, па кога веќе толку го малтретираат нашиот народ, да видиме – имаме различни причини за промена на текот на Ибар“, рече Вучиќ.

— реклама —

Реката Ибар е дел од системот поврзан со акумулацијата Газиводе на Косово, која има значајна улога и во производството на електрична енергија и во водоснабдувањето. Хидроцентралата во системот Газиводе обезбедува електрична енергија за значителен дел од Косово, додека системот Ибар-Лепенец се користи за водоснабдување на населението.

— реклама —

Најавата на Вучиќ следува во период на зголемени тензии околу состојбата на српското население на Косово. Во близина на Газиводе, властите во Приштина во изминатиот период уриваа објекти, што наиде на остри реакции од Белград, но и на реакција од Европската Унија.

Српскиот претседател порача дека Белград внимателно ги следи случувањата и дека Србија ќе постапува во согласност со сопствените интереси.