Костадинов по кривичната пријава: „Ќе одговарам за своите постапки, но барам правично судење“

Поранешниот градоначалник на Струмица, Костадин Костадинов, се огласи откако СВР Струмица поднесе кривична пријава против него и уште две лица поради сомневање за злоупотреба на службената положба и овластување и фалсификување исправа. Тој порача дека е подготвен да одговара за секоја своја одлука, но очекува доказите да бидат непристрасно оценети и да се почитува презумпцијата на невиност.

Според Министерството за внатрешни работи, покрај Костадинов, пријавени се и поранешна раководителка во општинскиот Сектор за урбанизам, комунални работи и градежно земјиште и управител на правно лице од Битола, кое во меѓувреме е ликвидирано.

Од МВР информираат дека наводните дејствија се случиле во 2022 година, кога Костадинов и поранешната раководителка, според пријавата, ја злоупотребиле службената положба за да овозможат легализација на бесправно изграден објект на катастарска парцела во селото Куклиш.

— реклама —

Според полициските наводи, раководителката побарала од управителот на правното лице да изготви елаборат за бришење објекти од парцелата. Во елаборатот и техничкиот извештај, според МВР, невистинито било наведено дека на локацијата нема објекти. Документите потоа биле употребени за бришење објекти во сопственост на Општина Струмица, со цел парцелата да добие чист имотен лист.

Со ваквата постапка, според полицијата, на лице од селото Куклиш му била овозможена противправна имотна корист. Костадинов, во својство на тогашен градоначалник, му издал решение за легализација на бесправно изградена зграда со намена: стовариште и внатрешна површина од 161 квадратен метар.

— реклама —

МВР наведува дека со легализацијата била овозможена и постапка за откуп на земјиштето под објектот, како и отуѓување на 866,46 квадратни метри државно земјиште и запишување на имотот на име на корисникот.

Во пријавата се наведува и дека не биле земени предвид претходни судски одлуки поврзани со објектот. Во 2016 година, Вишиот управен суд го одбил барањето за легализација, а во 2019 година била донесена и пресуда со која било потврдено дека објектот бил изграден без соодветно одобрение за градење. Претходно, градежен инспектор на Општина Струмица му наложил на сопственикот да ја отстрани градбата.

Според МВР, со пријавените дејствија била предизвикана штета на Општина Струмица и на државата. Кривичната пријава е поднесена до Основното јавно обвинителство Струмица.

— реклама —

По објавувањето на информацијата, Костадинов преку социјалните мрежи порача дека подолг период е изложен на јавни обвинувања и сомневања кои, според него, создаваат впечаток дека одговорноста е веќе утврдена пред да бидат сослушани неговите аргументи.

Тој наведе дека досега се воздржувал од јавни реакции по препорака на својот правен тим, во знак на почит кон постапките и институциите.

„Таа воздржаност е свесен избор, а не отсуство на аргументи. Својата одбрана ќе ја водам таму каде што се утврдува вистината и се одлучува за одговорноста“, напиша Костадинов.

Тој побара од медиумите точно и одговорно известување и нагласи дека очекува да се почитува презумпцијата на невиност.

„Не барам доверба на збор. Барам простор фактите да бидат слушнати и доказите непристрасно оценети“, порача поранешниот градоначалник.

Во објавата, Костадинов се осврна и на случаи за кои смета дека одговорноста се избегнува, споменувајќи ја заплената на 50 тони нелегална марихуана. Тој додаде дека очекува одговорност и од другите за јавно изнесените тврдења, а најави дека нема да ги остави без институционален одговор постапките за кои смета дека свесно му нанеле штета нему, на неговото новородено дете и на семејството.

Легализирал дивоградба и овозможил отуѓување државно земјиште, кривична пријава против поранешниот градоначалник на Струмица

СВР Струмица поднесе кривична пријава против поранешниот градоначалник на Струмица, поранешна раководителка во општинскиот Сектор за урбанизам и управител на правно лице од Битола, поради сомнение за злоупотреба на службената положба и овластување и фалсификување исправа.Според Министерството за внатрешни работи, пријавени се К.К. (36) од Струмица, кој во времето на наводното дело бил градоначалник на општината, С.Р. (38), тогашна раководителка на Секторот за урбанизам, комунални работи и градеж

Македонија | пред 7 часа