Крај на американската воена мисија во Ирак: По повеќе од една деценија, војниците се повлекоа

По повеќе од една деценија, САД ја завршија воената мисија во Ирак, откако американските сили ги напуштија преостанатите бази во земјата. Со тоа формално заврши и операцијата „Непоколеблива одлучност“ против Исламската држава.

— реклама —

Пентагон соопшти дека САД и партнерите од коалицијата ја завршиле мисијата во Ирак согласно со заедничката изјава на Вашингтон и Багдад од септември 2024 година. Сепак, американската страна ќе продолжи да обезбедува насочена обука и разузнавачка поддршка за ирачките партнери.

Портпаролот на Пентагон, Шон Парнел, изјави дека завршувањето на мисијата е резултат на 12-годишна кампања со која Исламската држава била поразена како организирана воена закана во Ирак и регионот.

— реклама —

Според него, завршувањето на операцијата претставува премин од коалициска воена мисија кон безбедносни активности предводени од Ирак, со поддршка преку билатерални безбедносни односи.

— реклама —

Американските сили беа распоредени во Ирак и Сирија во 2014 година, откако Исламската држава зазеде големи делови од териториите на двете земји. Организацијата беше поразена во Ирак во 2017 година, а во Сирија во 2019 година, но коалициските сили останаа во Ирак со цел да продолжат со борбата против нејзините остатоци.

Ирачкиот премиер Али ал Зајди го прогласи 1 октомври, првиот ден по заминувањето на коалициските сили, за Ден на суверенитетот. Тој оцени дека овој ден го потврдува завршувањето на патот на Ирак кон целосен суверенитет и натамошното зајакнување на државните институции.

Целосното повлекување на американските сили се случува 23 години по инвазијата предводена од САД во 2003 година, која доведе до соборување на тогашниот ирачки претседател Садам Хусеин и повеќегодишна нестабилност во земјата.