Еден работник од Кина на возраст од 38 години загина, а три лица се повредени во несреќа што вчера се случила на градилиште кај Бранков мост.
Третото основно јавно обвинителство во Белград информира дека јавен обвинител извршил увид на местото на несреќата и наредил да се земат изјави од сите присутни работници, како и од одговорните лица во компанијата каде што бил вработен починатиот.
Според првичните информации, до несреќата дошло поради хоризонтално поместување на товарот на кранот, при што товарот удрил во телехендерот. Од ударот, работникот паднал од корпа и се здобил со смртни повреди.
Обвинителот наредил и вклучување на трудовата и градежната инспекција, кои треба да утврдат дали на работниците им биле обезбедени соодветни безбедносни услови и дали користеле задолжителна заштитна опрема при работа со машини и на висина.
По прибирањето на сите докази, обвинителството ќе постапува врз основа на извештаите и обдукцискиот наод, по што ќе бидат преземени законски мерки.
Министерството за градежништво, сообраќај и инфраструктура изрази жалење за трагедијата и упати сочувство до семејството на загинатиот, посочувајќи дека мислите се и со повредените работници.
