Кражба од околу пет милиони евра ја остави електровлечната подстаница во Драчево целосно уништена

Во електровлечната подстаница Драчево, која се наоѓа меѓу железничките станици Лисиче и Драчево, е извршена кражба од големи размери, при што е уништен значителен дел од електроенергетската опрема неопходна за функционирањето на железничката инфраструктура, соопштуваат од Министерството за транспорт.

— реклама —

Според информациите од Министерството за транспорт, сторителите насилно превртеле два електроенергетски трансформатори, тешки повеќе од 30 тони. Од нив било испуштено трансформаторското масло, а бакарните намотки и другите вредни делови биле демонтирани и однесени.

— реклама —

Од објектот биле украдени и бакарни жици, бакарни шини, прачки и речиси целата опрема потребна за работа на подстаницата, поради што таа е целосно ставена надвор од функција.

— реклама —

Првичните проценки покажуваат дека причинетата материјална штета изнесува околу пет милиони евра.

Од Министерството оценуваат дека не станува збор само за кражба на бакар и опрема, туку за сериозен удар врз критичната железничка инфраструктура, кој може да има последици врз безбедноста и нормалното одвивање на железничкиот сообраќај.