Во соопштение од Министерството за транспорт се наведува дека изградбата на Коридорот 8 се одвива со силна динамика и во делот на патната и железничката инфраструктура.
Во соопштението се пренесува дека вицепремиерот и министер за транспорт, Александар Николоски, истакнал оти роковите за изградба на пругата кон Бугарија остануваат непроменети, согласно договорената динамика.
„Очекувам не подоцна од десетина дена од денеска да излезе тендерот за изградба, за да можеме во текот на летото да започнеме со градежните активности за третата фаза од пругата кон Бугарија“, се наведува во соопштението со изјава на Николоски.
Во него се додава дека работите на делницата од Бељаковце до Крива Паланка се одвиваат со забрзано темпо по надминување на претходни предизвици, додека за изградбата на заедничкиот тунел со Бугарија ќе продолжи соработка меѓу двете страни, стои во соопштението.
„Рокот за завршување на пругата останува ист – 2031/2032 година“, стои во соопштението.
Министерството информира и дека во западниот дел од Коридорот 8 постои подготвеност за доизградба на пругата, но дека е потребна и координација со соседните земји, особено Албанија.
Дополнително во соопштението се наведува дека патните делници Тетово–Гостивар и Гостивар–Букојчани се реализираат согласно планираната динамика, а за останатите проекти се очекуваат следни фази во постапките за избор на изведувачи.
