Кражба во музеј во Италија: Украдени четири дела од познат раноренесансен сликар

Четири уметнички дела од ренесансниот сликар Антонело да Месина се украдени од Регионалниот музеј во Месина, јавуваат италијанските медиуми, повикувајќи се на управата на музејот.

— реклама —

Со кражбата, Месина остана без единственото сочувано дело на познатиот сликар што досега се чуваше во неговиот роден град, како и без уште една помала слика од неговиот опус, која сицилијанскиот регион ја купил пред 20 години.

— реклама —

Крадците влегле во музејот во текот на ноќта и со себе однеле три од преостанатите пет панели од Полиптихот на Свети Григориј, дело изработено во техника темпера на дрво. Антонело да Месина го завршил полиптихот во 1473 година, а првично бил наменет за локалниот манастир „Свети Григориј“, кој бил уништен во земјотресот што ја погодил Месина во 1908 година.

Од музејската витрина била украдена и помала двострана слика. На едната страна се прикажани Богородица со детето и францискански монах, а на другата Христос. Делото било дел од колекцијата на Вилхелм Солдан, а во 2003 година било купено од сицилијанскиот регион преку аукциската куќа „Кристи'с“. Истата година му било припишано на Антонело да Месина.

— реклама —

Кражбата се случила само два дена откако италијанската полиција пронашла три слики од француските мајстори Пол Сезан, Пјер-Огист Реноар и Анри Матис, кои во март биле украдени од музеј во близина на Парма.

Антонело да Месина е роден околу 1430 година, а се школувал во Неапол, каде што ги проучувал делата на провансалските и фламанските уметници. Во родната Месина се вратил во 1457 година и таму работел до 1474 година.