Кредитот од 1 милијарда евра за Македонија под истрага во Унгарија

Унгарската полиција отвори кривична истрага за четири случаи поврзани со работењето на државната Ексимбанка, меѓу кои е и кредитот од една милијарда евра одобрен за Македонија.

Според „Ројтерс“, кој се повикува на соопштение од унгарската полиција, предметите се истражуваат поради сомнежи за злоупотреба на службената положба и несовесно управување. Кредитот за Македонија е еден од случаите што во јули биле пријавени до полицијата од унгарското Министерство за економија, по спроведена ревизија на работењето на банката.

— реклама —

Во рамки на истрагата, во понеделникот истражителите заплениле илјадници страници интерна документација од Министерството за економија.

„Овие документи се обезбедени во текот на внатрешната истрага и содржат дополнителни информации важни за испитувањето на пријавените дела“, соопшти унгарската полиција.

Ексимбанка, која до јуни 2022 година беше под надлежност на Министерството за надворешни работи, а потоа премина под Министерството за економија, засега не се огласила со коментар.

— реклама —

Кредитот за Македонија е одобрен со каматна стапка од 3,25 отсто и со целосна државна гаранција. Според унгарскиот премиер Петер Маѓар, постои сомнеж дека средства што првично биле наменети за поддршка на унгарските компании можеле да бидат користени за зајакнување на странски политички сојузници, како и дека одредени компании блиски до поранешната власт можеле да имаат корист.

Средствата од кредитот што Македонија го обезбеди од Унгарија се наменети за поддршка на домашната економија и за инфраструктурни проекти. Од вкупниот износ, 250 милиони евра се пласирани директно во домашното стопанство, додека други 250 милиони евра се наменети за проекти во општините.

— реклама —

Преку јавни повици средствата се насочуваат кон капитални и инфраструктурни проекти, меѓу кои изградба и реконструкција на детски градинки, училишта, спортски сали и локални улици, како и изградба на гасоводна мрежа во Куманово.

Премиерот Христијан Мицкоски претходно оцени дека кредитните средства ќе придонесат за подобрување на инфраструктурата и забрзување на реализацијата на развојните проекти во општините.

Истрагата во Унгарија опфаќа уште три случаи поврзани со Ексимбанка, меѓу кои и инфраструктурен проект во Африка. Според Маѓар, Ексимбанка и Унгарската банка за развој обезбедиле гаранција за финансирање во вредност од 126 милијарди форинти, односно околу 398 милиони долари.

Унгарските власти најавија детална проверка на сите четири случаи за да утврдат дали биле почитувани законските процедури и дали државните средства биле користени за намените за кои биле одобрени.

Ексимбанка е во целосна државна сопственост и е основана во 1994 година со цел поддршка на надворешната трговија и извозот на унгарските компании. Банката функционира во интегриран систем со унгарската компанија за осигурување на извозни кредити МЕКСИБ, под заедничкиот бренд ЕКСИМ.