Кривична пријава против петмина скопјани за терористичка организација

Министерството за внатрешни работи поднесе кривична пријава против пет лица од Скопје поради сомнение дека сториле кривично дело „терористичка организација“.

— реклама —

Како што соопшти МВР, пријавени се Ј.К. (30), Ј.М. (22), М.Т. (23), Р.К. (23) и Г.М. (34), сите од Скопје. Постапката е поведена врз основа на претходно добиени сознанија и информации од меѓународни партнери, а акцијата била реализирана во координација со Агенцијата за национална безбедност и под раководство на Основното јавно обвинителство за гонење организиран криминал и корупција.

— реклама —

Според истрагата, првоосомничениот кон крајот на 2024 година формирал интернет-медиумски канал и група во која членувале останатите пријавени. Во текот на 2025 и 2026 година тие, според МВР, дејствувале како терористичка организација која јавно повикувала и поттикнувала формирање терористичка организација врз основа на идеологијата на ИСИС и други сродни екстремистички организации.

Во групата биле споделувани пропагандни и идеолошки содржини со цел ширење радикални ставови, идеолошка индоктринација и глорификација на припадниците на ИСИС.

— реклама —

На 16 јуни, со судска наредба, биле извршени претреси на пет локации во Скопје, од кои три во Казнено-поправната установа „Идризово“, каде што дел од осомничените издржуваат затворски казни или се наоѓаат во притвор. Претреси биле извршени и во домовите на двајца од осомничените.

— реклама —

При акцијата биле пронајдени и одземени повеќе електронски уреди кои ќе се користат како доказен материјал во натамошната постапка.