„Кривична пријава за граѓанин што го навредил Мицкоски? Цела Македонија треба да поднесе пријави против Мицкоски“, вели СДСМ

СДСМ преку соопштение реагираше по информацијата дека е поднесена кривична пријава против граѓанин поради навреда упатена кон премиерот Христијан Мицкоски, оценувајќи дека станува збор за двојни аршини.

— реклама —

Од партијата тврдат дека Мицкоски со години користел навредливи квалификации за граѓаните, наведувајќи дека ги нарекувал „талог на општеството“, „мочуриште“, „медиокритети“, „лешинари“ и „глодари“.

— реклама —

СДСМ прашува дали во конкретниот случај повторно имало политичко влијание врз обвинителството, алудирајќи дека премиерот сакал да покаже дека никој нема право јавно да ја критикува неговата политика.

Во соопштението партијата упатува и критики за економската состојба во државата, обвинувајќи дека додека граѓаните се соочуваат со финансиски тешкотии, премиерот користи државни ресурси за приватни патувања и носи луксузен часовник.

— реклама —

СДСМ ги повика граѓаните да поднесат кривични пријави против Христијан Мицкоски поради, како што наведуваат, неговото „постојано и систематско навредување на народот“.

— реклама —

Воедно, од партијата порачаа дека за, како што тврдат, труење, криминал и корупција, ќе бидат поднесени кривични пријави кога, според нив, ќе дојде „времето на вистината и правдата“.