Кривична за бесправна сеча во Радовишко: Уништени 261 дабови дрвја

СВР Струмица – ОВР Радовиш поднесе кривична пријава против две лица од општина Конче поради сомнение дека извршиле бесправна сеча на 261 дабово стебло, предизвикувајќи штета од над 300.000 денари на ЈП „Национални шуми“.

— реклама —

Како што информира Министерството за внатрешни работи, кривичната пријава е поднесена против Ѓ.Н. (43) и Д.Н. (69), двајцата од селото Ракитец, поради постоење основи на сомнение за сторено кривично дело „пустошење на шума“ по член 226 од Кривичниот законик.

— реклама —

Според пријавата, на 16 април годинава околу 14:30 часот, на местото викано „Горици“ во атарот на селото Ракитец, без одобрение од надлежен орган, од катастарска парцела сопственост на Јавното претпријатие „Национални шуми“ – Шумско стопанска единица „Смрдешник“, извршиле бесправна сеча на вкупно 261 стебло дабово дрво.

— реклама —

Со незаконската сеча, како што наведуваат од МВР, на ЈП „Национални шуми“ му била причинета материјална штета во вкупен износ од 304.920 денари.

— реклама —

Случајот е доставен до Основното јавно обвинителство Радовиш, кое ќе постапува понатаму по поднесената кривична пријава.