СВР Охрид поднесе кривична пријава против Зоран Ногачески (60) од селото Волино, поранешен градоначалник на Општина Дебрца, поради сомнение дека сторил кривично дело „злоупотреба на службена положба и овластување“ по член 353 од Кривичниот законик.
Според информациите од Министерството за внатрешни работи, пријавениот во периодот од 2017 до 2025 година, во својство на градоначалник на Општина Дебрца, со пропуштање на должен надзор не ги утврдил правните и физичките лица кои биле сопственици, корисници или носители на право на располагање со недвижен имот на територијата на општината, а кои имале обврска да плаќаат данок на имот.
Воедно, како што наведува МВР, не било извршено ниту нивно реоданочување, со што била предизвикана штета на буџетот на Општина Дебрца во износ од 431.245 денари.
По целосното документирање на случајот, против пријавениот е поднесена кривична пријава до надлежното обвинителство.
