Кривична за осум инспектори: Со години не извршиле надзор во угостителски објект во Кочани

Одделението за внатрешни работи Кочани денеска до Основното јавно обвинителство Кочани поднесе кривична пријава против осум лица поради сомнение за сторено кривично дело „несовесно работење во службата“.

— реклама —

Како што соопшти МВР, пријавени се С.Ш.С. (53) од Македонски Брод, С.Ѓ. (59) од Скопје, како и З.М. (64), С.З. (61), Т.К. (42), Н.Д. (43), Г.П. (41) и М.З.С. (44), сите од Кочани. Тие, како службени лица вработени во Државниот инспекторат за труд, се сомничат дека во периодот од 2022 година до 16 март 2025 година несовесно ги извршувале своите службени должности.

— реклама —

Според МВР, иако биле законски обврзани да вршат инспекциски надзор, пријавените ниту еднаш не покренале постапка по службена должност за контрола на угостителски објект во Кочани, кој во период од 13 години бил единствен објект од таков вид на подрачјето на општината.

— реклама —

Со тоа, како што се наведува, не го спречиле незаконското работење на објектот и во континуитет ги изложувале ангажираните лица на опасност поради непроверени услови во однос на работните права, безбедноста и здравјето при работа.

— реклама —

МВР наведува дека на овој начин му овозможиле на угостителскиот објект незаконски да продолжи со вршење на дејноста, при што била остварена противправна имотна корист во износ од 1.255.977 денари.