Кривична за струмичка фирма и управител за даночно затајување од над 1,7 милиони денари

Министерството за внатрешни работи соопшти дека СВР Струмица поднел кривична пријава против правно лице од Струмица и против 50-годишниот Н.Б. поради сомнение за сторено кривично дело „даночно затајување“.

— реклама —

Според полицијата, пријавениот правен субјект како даночен обврзник, заедно со управителот Н.Б., во повеќе наврати избегнувале целосно или делумно плаќање на даноци преку неевидентирање на промет, неточно утврдување на даночната основа, прикажување помали приходи и поголеми расходи.

— реклама —

Од МВР информираат дека во периодот од 2022 до 2025 година не биле пресметани и уплатени даноци по основа на ДДВ, данок на добивка и персонален данок на доход.

— реклама —

Според пријавата, во 2022 година неплатените даноци изнесувале 357.288 денари, во 2023 година 355.371 денари, во 2024 година 760.763 денари, а во 2025 година 247.080 денари.

— реклама —

Со овие дејствија, како што наведуваат од полицијата, пријавените се стекнале со противправна имотна корист и предизвикале штета на државниот буџет во вкупен износ од 1.720.502 денари.