Синоќешниот судир меѓу две групи мигранти во шумска област кај Обреновац завршил трагично, со еден загинат и еден тешко ранет маж.
Иако полициската акција „Вихор 3“ официјално е завршена, инспектори и специјални единици и понатаму трагаат по вооружениот напаѓач.
Според српските медиуми, полицијата при пребарување на теренот пронашла тело на маж со прострелна рана во грбот, завиткано во ќебе.
На местото бил пронајден и друг мигрант со прострелна рана во ногата, кој е во критична состојба.
Тешко ранетиот маж бил пренесен во болница, каде што лекарите се борат за неговиот живот.
„Пациентот е во толку тешка состојба што не е можно да се разговара со него. Истрагата е отежната бидејќи единствениот преживеан сведок не може да даде информации за напаѓачите“, изјавил извор близок до истрагата.
Истрагата ја презеде Вишото јавно обвинителство во Белград, кое случајот го третира како тешко убиство и обид за убиство.
Полицијата и натаму е присутна на клучните точки во околината на Обреновац и работи на идентификација и пронаоѓање на учесниците во престрелката.
Според информациите, се верува дека напаѓачот ја напуштил непосредната близина на населените места, додека полициските патроли се засилени заради безбедноста на граѓаните.
