Куба повторно остана без електрична енергија, откако националниот електроенергетски систем целосно колабираше по третпат за помалку од две недели.
Државната електрокомпанија соопшти дека до прекинот дошло по дефект во производствена единица во источната провинција Холгин, што предизвикало нагла промена на фреквенцијата и пад на целиот систем.
Властите информираа дека веднаш биле активирани протоколите за постепено обновување на снабдувањето, при што најпрво се воспоставуваат изолирани електроенергетски мрежи за болниците, прехранбените капацитети и другите приоритетни објекти.
Во текот на денот, електричната енергија делумно беше вратена во одредени делови од Хавана, како и во неколку други провинции.
Последните прекини дополнително ја продлабочија кризата на островот, каде повеќе од девет милиони жители веќе со месеци се соочуваат со чест недостиг на струја. Прекините влијаат врз јавниот превоз, здравството, снабдувањето со вода, телекомуникациите и воздушниот сообраќај.
Според властите, кризата дополнително се влошила по американските мерки со кои беше ограничен увозот на нафта. Куба произведува околу 40 проценти од потребното гориво, а остатокот традиционално го обезбедува преку увоз.
Во меѓувреме, четворица демократски членови на американскиот Конгрес, кои неодамна ја посетија Куба, остро ја критикуваа политиката на администрацијата на Доналд Трамп, оценувајќи дека енергетското ембарго ја претвора Куба во „тивка Газа“.
