Милиони жители на Куба и натаму се без електрична енергија, откако во понеделникот дојде до колапс на националната електроенергетска мрежа.
Националниот оператор на електромрежата соопшти дека постепено се обновува снабдувањето со струја, а повторно е поврзан централниот дел од земјата, од пристаништето Мариел до провинцијата Санкти Спиритус.
Во главниот град Хавана струјата е вратена во околу една третина од градот, но снабдувањето сè уште е нестабилно, додека големи делови остануваат без електрична енергија.
Властите сè уште не ја соопштија причината за дефектот. Ова е трет голем колапс на електроенергетската мрежа што ја погодува Куба оваа година.
Прекинот ги остави без струја речиси сите од околу 10 милиони жители на островската држава.
Колапсот на мрежата доаѓа во период кога Куба се соочува и со засилен економски притисок и санкции од САД, што дополнително ја отежнува состојбата во земјата.
