Шпанија и Аргентина в недела од 21 часот во Њујорк ќе се борат за титулата светски првак, а евентуалниот триумф на „црвената фурија“ би можел да донесе и едно необично исполнување на ветување од Марк Кукуреља.
Левиот бек на шпанската репрезентација пред почетокот на Светското првенство изјави дека ќе го истетовира ликот на селекторот Луис де ла Фуенте доколку Шпанија ја освои титулата.
„Доколку Шпанија го освои Светското првенство, ќе го истетовирам лицето на селекторот Луис де ла Фуенте“, изјави Кукуреља.
Ова не е првпат шпанскиот репрезентативец да даде вакво необично ветување. Пред Европското првенство во 2024 година, тој најави дека ќе ја обои косата во црвена боја ако Шпанија стане европски шампион.
Откако Шпанија ја совлада Англија со 2:1 во финалето и ја освои европската титула, Кукуреља го исполни ветувањето и ја обои својата препознатлива долга коса во црвена боја.
Доколку Шпанија ја победи Аргентина во финалето на Светското првенство, 27-годишниот дефанзивец ќе треба повторно да остане доследен на својот збор, овојпат со тетоважа од ликот на селекторот Луис де ла Фуенте.
