Кувајт би можел да обнови речиси 70 отсто од своето производство на нафта во рок од најмногу осум недели по повторното отворање на Ормускиот теснец, изјави шеикот Калед Ахмад Ал-Сабах, директор за меѓународен маркетинг во државната нафтена компанија Кувајт Петролеум Корпорејшн (КПЦ).
Според него, преостанатите 30 проценти од производството би можеле да се вратат на вообичаеното ниво околу еден месец подоцна. Тој додаде дека компанијата може да го обнови работењето на своите рафинерии во рок од две до три недели, при што располага со капацитет за преработка од околу 1,4 милиони барели дневно.
Изјавата доаѓа во услови на продолжена неизвесност околу Ормускиот теснец, откако Иран воспостави контрола врз клучната поморска рута и го ограничи транзитот за бродови поврзани со САД, Израел и нивните сојузници. Во меѓувреме, Вашингтон воведе блокада на иранските пристаништа во Оманскиот Залив и Арапското Море.
И покрај тековните дипломатски контакти меѓу Вашингтон и Техеран, договор за нормализирање на сообраќајот низ Ормускиот теснец сè уште не е постигнат.
Меѓународната агенција за енергија предупреди дека дури и ако конфликтот заврши во текот на јуни, понудата на нафта на светските пазари ќе заостанува зад побарувачката најмалку до октомври. Според проценките, целосното закрепнување на енергетскиот сектор во регионот може да потрае од шест до осум месеци.
