Лаптоп се запалил во авион на American Airlines: Патници се здобиле со изгореници

Патник побарал лекарска помош откако лаптоп се запалил во авион на American Airlines за време на летот од Атланта кон Далас. Авионот безбедно слетал на аеродромот „Далас-Форт Ворт“, а патникот по прегледот бил пуштен, објави Би-би-си.

Според аудиоснимка што ја објави CBS News, пилотот за време на летот ја известил контролата на летање дека има „пожар во задниот дел од кабината“, додавајќи дека екипажот се обидува да го изгасне.

— реклама —

Подоцна пилотот пријавил дека најверојатно четворица или петмина патници се здобиле со изгореници од лаптопот, кој во тој момент бил ставен под контрола во средишниот дел од авионот.

Од American Airlines за Би-би-си потврдиле дека авионот безбедно слетал по пријава за чад од уред на патник за време на слетувањето. Од компанијата го пофалиле екипажот за професионалноста и брзата реакција при ставањето на уредот под контрола.

— реклама —

По слетувањето, авионот бил пречекан од итните служби, согласно предвидениот протокол.

— реклама —

Случајот повторно го отвора прашањето за ризикот од литиумските батерии, какви што се користат во лаптопите и другите електронски уреди. Американската Федерална управа за воздухопловство (FAA) предупредува дека батериите може да се прегреат доколку се оштетени, изложени на вода, преполнети или неправилно спакувани.

Според FAA, електронските уреди со литиумски батерии треба да се превезуваат во рачниот багаж. Само годинава регулаторот регистрирал 58 инциденти со литиумски батерии поврзани со чад, пожар или екстремно загревање. Во последните 20 години, најголем број инциденти биле поврзани со преносни батерии, додека 84 случаи се однесувале на лаптопи.

Слични инциденти се регистрирани и на други летови. Во мај, авион на EasyJet од Египет кон Велика Британија бил пренасочен кон Рим откако преносен полнач се загревал во торба на патник во багажниот простор. Летот продолжил дури следниот ден.

Британската управа за цивилно воздухопловство предупредува дека преносните батерии сè почесто предизвикуваат сериозни проблеми во авионскиот сообраќај поради ризикот од прегревање и пожар.