Заменик-министерот за надворешни работи на Русија, Александар Грушко, изјави дека според проценките на Москва, земјите членки на НАТО спроведуваат подготовки за можен воен конфликт со Русија во наредните години.
Во интервју за рускиот весник „Известија“, Грушко оцени дека главната цел на НАТО и Европската Унија е постигнување „стратешки пораз“ на Руската Федерација.
„Ако ја погледнеме суштината на нивната политика, нивните активности на меѓународната сцена и приоритетите што ги артикулираат земјите од НАТО и ЕУ, може да се заклучи дека нивната главна цел е стратешки пораз на Русија“, изјавил Грушко.
Тој додал дека Москва смета оти Алијансата навистина се подготвува за можен воен судир со Русија околу 2030 година.
Руските медиуми потсетуваат дека минатата недела и шефот на руската дипломатија, Сергеј Лавров, во авторски текст на тема „Украина, Европа и глобалната безбедност“ изнесе слични ставови.
Според Лавров, европските држави на различни начини се обидуваат да добијат време за до 2030 година да достигнат целосна воена подготвеност за евентуален конфликт со Русија.
Лавров, исто така, предупреди дека актуелната меѓународна ситуација носи ризик од директен судир меѓу НАТО и Русија, кој, според него, би можел брзо да ескалира.
Од НАТО во повеќе наврати претходно истакнаа дека Алијансата има одбранбен карактер и дека не бара конфликт со Русија, но нагласуваат дека ќе продолжат да ја зајакнуваат безбедноста и одбранбените капацитети на земјите членки.
