Лажна хуманитарна акција во Дебар: преку социјална мрежа собирале пари за непостоечко лекување на „болно дете“

Двајца лица од Дебар се соочуваат со кривична пријава за измама, откако преку социјална мрежа лажно прикажувале дека собираат пари за лекување на болно дете, со што прибавиле противправна имотна корист.

— реклама —

Од Министерството за внатрешни работи информираат дека Надворешната канцеларија за криминалистички работи Дебар поднела кривична пријава против Х.М.(19) од село Селокуќи и И.К.(28) од Дебар.

Според полицијата, првопријавената, поттикната од второпријавениот, во периодот од 10 до 12 март годинава довела во заблуда повеќе лица преку лажно прикажување факти на социјална мрежа.

— реклама —

„Првопријавената, поттикната од второпријавениот, во периодот од 10.03.2026 до 12.03.2026 довела во заблуда повеќе луѓе така што лажно прикажувала факти преку социјална мрежа, односно преку профил со кој менаџирал второпријавениот, собирала парична помош за операција, односно лекување на наводно болно дете од Дебар“, информираат од МВР.

— реклама —

На овој начин, осомничените успеале да прибават значителна сума пари од граѓани кои поверувале во апелот.

„На тој начин првопријавената се стекнала со противправна имотна корист во вкупен износ од 3.200 евра и 6.000 денари“, информираат од МВР.

Против осомничените се води постапка за кривично дело измама, а надлежните институции преземаат мерки за целосно расчистување на случајот.