Легалниот канабис од Канада и САД завршува на црниот пазар во Европа

Шверцот на канабис кон Европа бележи значителен пораст поради вишоците создадени на легалните пазари во Канада, делови од САД и Тајланд, предупредува Европол. Поради зголемената присутност на оваа дрога, европската полициска агенција формирала посебна оперативна група.

Според Европол, легализацијата на канабисот во одредени делови од Северна Америка и во Тајланд довела до прекумерна понуда на производи со висока концентрација на ТХЦ. Дел од тие производи потоа се пренасочуваат кон нелегалниот европски пазар.

— реклама —

Организираните криминални групи ги користат разликите во законодавството меѓу државите и дрогата ја шверцуваат скриена во товар, преку фиктивни компании и интернет-пазари. Од средината на 2023 година, земјите членки на ЕУ регистрираат значителен пораст на шверцот со воздушен товар, контејнери и курирски служби, особено од Северна Америка и Тајланд.

Европол предупредува дека криминалните мрежи поврзани со трговијата со канабис често се поврзани и со насилство, корупција и перење пари. Дополнителен ризик претставуваат производите со висока концентрација на ТХЦ, како и канабисот од нерегулирано производство, каде што може да се користат штетни пестициди.

Како пример за начинот на работа на криминалните мрежи, Европол ја издвојува операцијата спроведена на 30 септември во Белгија и Франција против група осомничена за шверц на канабис и кокаин преку аеродромот во Брисел.

— реклама —

Истрагата започнала во февруари 2025 година, откако во напуштен багаж пристигнат од Мексико биле пронајдени 30 килограми кокаин. Истрагата потоа открила мрежа која користела курири, лица задолжени за преземање на багажот со дрога и вработени на аеродромот за заобиколување на безбедносните и царинските контроли.

Во акцијата биле уапсени 19 осомничени во Белгија и двајца во Франција. Запленети биле повеќе од 57.000 евра во готовина, осум возила, две парчиња огнено оружје, дрога, електронска опрема, накит, луксузен часовник и друга стока.

— реклама —

Според Европол, мрежата користела и таканаречени „екстрактори“ – лица кои во последен момент купувале евтини авионски билети за да пристапат до просторот за преземање багаж. Таму ги земале куферите со дрога и ги носеле во блиски хотели, каде што ги предавале на други членови на групата.

Откако властите почнале почесто да ги пресретнуваат ваквите пратки, групата, според Европол, започнала да ангажира и вработени на аеродромот, кои ја ваделе дрогата од багажот пред тој да стигне до лентата.

Новата оперативна група на Европол треба да ги поврзе полицијата, царинските и финансиско-разузнавачките служби и меѓународните партнери, со цел подобар надзор на границите, следење на финансиските текови и спречување на новите методи на шверц.

Европол предупредува и дека криминалните организации сè почесто ја користат западноафриканската рута, која е позната и по шверцот на кокаин. На тој начин истите мрежи можат да ја користат истата логистика, инфраструктура и меѓународни контакти за трговија со различни видови дрога.

Според проценките на Европол, трговијата со канабис сочинува околу 38 отсто од малопродажниот пазар на нелегални дроги во ЕУ. Околу 22 милиони корисници годишно трошат приближно девет милијарди евра на канабис.